News

O Académico Numerario desta institución Excmo. Sr. D. José María Botana López, faleceu o día 9 de marzo de 2025.

José María Botana López naceu na Coruña en 1933. Fillo predilecto do Concello de Frades (A Coruña).

Foi nomeado Académico de Número Electo da Academia Galega de Xurisprudencia e Lexislación o día 7 de maio de 1999, Medalla corporativa número 2, tomando posesión o día 29 de xuño de 2001 coa lectura do discurso de ingreso regulamentario titulado “A contribución da xurisprudencia social de Galicia á formación da xurisprudencia social do Tribunal Supremo (1990-1999)”, contestando en nome da corporación o Excmo. Sr. D. Francisco Puy Muñoz.

Académico-Secretario Xeral da Real Academia Galega de Xurisprudencia e Lexislación desde o ano 2009 ata o ano 2021.

Licenciado en Dereito pola Universidade de Santiago de Compostela (1955). Doutor en Dereito pola Universidade da Coruña. Entre 1959 e 1964 foi Xuíz de Primeira Instancia e Instrución en Belchite, Alcañices e en Muros; Jerez de los Caballeros, Sarria e Cambados (entre 1964 e 1973).

Maxistrado de Traballo en Vigo e Coruña (entre 1973 e 1989). Maxistrado da Sala Social do Tribunal Superior de Xustiza de Galicia (1989-1998). Presidente da Sala do Social do Tribunal Superior de Xustiza de Galicia (1997-1998).
En 1998 foi nomeado maxistrado do Tribunal Supremo, Sala Cuarta do Social, posto que desempeñou ata a súa xubilación.

Presidente do Padroado da Escola de Relacións Laborais da Coruña.

Exerceu como Profesor Titor de Dereito de Traballo e da Seguridade Social, no Centro Asociado da Coruña da Universidade Nacional de Educación a Distancia (1985-1998) e de 1990 a 1998 como Profesor Asociado da Área de Dereito de Traballo e da Seguridade Social da Facultade de Dereito da Universidade da Coruña e participou como relator e director en cursos de formación de xuíces e maxistrados,  a nivel nacional, autonómico e local, organizados polo Consello Xeral do Poder Xudicial; así como impartindo conferencias e relatorios en distintos cursos, seminarios, e congresos organizados por outras institucións e asociacións profesionais públicas e privadas.

Todos os membros desta Real Academia queren expresar a súa dor pola perda de tan ilustre xurista e apreciado compañeiro, que honro á institución coa súa pertenza a ela. Descanse en paz.