News

O Pleno de numerarios desta Real Academia Galega de Xurisprudencia e Lexislación, na súa última sesión celebrada o día 12 de xuño, elixiu ao Excmo. Sr. D. Carlos Lema Devesa novo Académico de Número, para ocupar a vacante producida na Medalla número 4 da Corporación, por falecemento do Excmo. Sr. D. Carlos Fernández-Nóvoa Rodríguez.

Natural de Santiago de Compostela, é Licenciado en Dereito pola Universidade de Santiago de Compostela. Premio Extraordinario de Licenciatura. Realizou a súa tese de doutoramento nesta universidade sobre “La publicidad de tono excluyente”, dirixida por D. Carlos Fernández-Nóvoa e galardoada co Premio Nacional “Doctor Adolfo Muñoz Alonso”. Ampliou os seus estudos de Dereito Industrial, Competencia Desleal no Instituto Max-Planck de Dereito Industrial de Múnic.

É catedrático de Dereito Mercantil da Universidad Complutense de Madrid e exerce como avogado, especialista en dereito da propiedade industrial, dereito da propiedade intelectual, competencia desleal e publicidade, dereito da contratación e dereito da empresa.

É académico correspondente da Real Academia de Xurisprudencia e Lexislación e tamén da Real Academia de Farmacia de Galicia. Foi bolseiro, vogal do padroado e actualmente secretario da Fundación Barrié, que lle concedeu a súa Medalla de Prata.

É coautor do anteproxecto de Lei xeral de publicidade, así como doutros anteproxectos de Lei da Comunidade Autónoma de Galicia. Ademais, é autor o coautor de quince libros e máis dun centenar de artigos doutrinais.

Presidente da Asociación de Xuristas Galegos en Madrid (IURISGAMA).

Presidente de Honra da Asociación de Bolseiros da Fundación Barrié.

A súa candidatura estaba presentada polos Académicos de Número, Excmos. Sres. D. José Manuel Liaño Flores, D. Xesús Palmou Lorenzo e D. Jesús Souto Prieto.